અમદાવાદઃ અંબાજી મંદિરમાં મોહનથાળના પ્રસાદના વિવાદમાં હવે કોંગ્રેસ પણ મેદાનમાં આવ્યું છે. પ્રદેશ કોંગ્રેસ પ્રમુખ જગદીશ ઠાકોરે અંબાજીમાં મોહનથાળના બદલે ચીકીનો પ્રસાદ આપવામાં આવી રહ્યો છે તેની સામે નારાજગી વ્યક્ત કરી છે. તેમણે મોહનથાળનો પ્રસાદ ચાલુ રાખવાની માંગ સાથે આકરા શબ્દોમાં પોતાની વાત રજૂ કરી છે. તેમણે પ્રસાદ તો ચાલુ કરાવીને જ રહીશું તેવા સૂરમાં પોતાની વાત રજૂ કરી હતી. રાજ્ય સરકાર દ્વારા અંબાજી મંદિરના પ્રસાદ મુદે સ્પષ્ટતા કરાઇ હતી.
અંબાજી મોહનથાળ મુદ્દે આકરા મૂડમાં કોંગ્રેસ?
અમદાવાદના માધુપુરામાં આવેલા અંબાજી મંદિરમાં દર્શન કરવા માટે પહોંચેલા જગદીશ ઠાકોરે અંબાજી શક્તિપીઠ મંદિરમાં મોહનથાળના બદલે ચીકીનો પ્રસાદ શરુ કરવામાં આવ્યો છે તે મામલે આકરા શબ્દોમાં કહ્યું છે કે, “અંબાજીના સ્થાનિકોને રોજીરોટી મળતી હતી, આ મંદિરના સ્થાપક દાતા દરબારે કહ્યું છે અમારા પૂર્વજો મોહનથાળથી આ પ્રસાદની શરુઆત કરી હતી.”
જગદીશ ઠાકોરે કહ્યું કે, “જે પરંપરાઓ છે, જે શ્રદ્ધાઓ સાથે જોડાયેલો મહાપ્રસાદ છે તેને શા માટે બદલવામાં આવે છે? આ તો એવું છે કે મોહનથાળ બદલીને ત્યાં ચીકી ચાલુ.. કાલે મહુડીમાં સુખડી બદલીને ગોળ-ધાણા ચાલુ કરાશે!” જગદીશ ઠાકોરે આકરા શબ્દોમાં મોહનથાળનો પ્રસાદ બંધ કરવા સામે નારાજગી વ્યક્ત કરી છે. આ સાથે પરંપરાને ફરી શરુ કરાવવાની નેમ લઈને કહ્યું કે અમે આ નહીં ચાલવા દઈએ.
અંબાજી મંદિર, માધુપુરા, અમદાવાદ ખાતે દર્શન કરી માતાજીને પવિત્ર મોહનથાળનો પ્રસાદ ચઢાવી, પવિત્રધામ અંબાજી મંદિર ખાતે આસ્થા રૂપે અપાતો મોહનથાળનો પ્રસાદ ફરી ચાલુ થાય તે માટે કોંગ્રેસના આગેવાનશ્રીઓ સાથે પ્રાર્થના કરશે.#Ambaji #Jagdishthakor @INCGujarat pic.twitter.com/XNPeO241ri
— Jagdish Thakor (@jagdishthakormp) March 12, 2023
દર્શનાર્થીઓની પરંપરાગત પ્રસાદ ચાલુ રાખવાની માંગ
અંબાજીમાં મોહનથાળને બદલે ચીકીનો પ્રસાદ કરવામાં આવ્યો તેને અઠવાડિયા કરતા વધુ સમય થઈ ગયો છે. અહીં આવનારા દર્શનાર્થીઓ પણ પ્રસાદમાં મોહનથાળ ના મળવાના કારણે નારાજગી વ્યક્ત કરી છે. વિશ્વ હિન્દુ પરિષદ દ્વારા શનિવારે મોહનથાળનો પ્રસાદ ફરી શરુ કરવામાં આવે તે મુદ્દે ધરણા કરીને નારાજગી વ્યક્ત કરી હતી.
અંબાજી મોહનથાળ પ્રસાદ વિવાદ મામલો
વિવાદ વચ્ચે કોંગ્રેસ પક્ષ આવ્યું મેદાનમાં
પ્રદેશ કોંગ્રેસ પ્રમુખ જગદીશ ઠાકોરનો વિરોધ #Gujarat #News18GujaratiNo1 #ambajitemple pic.twitter.com/UXZtxyfroJ— News18Gujarati (@News18Guj) March 12, 2023
વડોદરાના એક દર્શનાર્થીએ જણાવ્યું કે, હું જ્યારે અહીં મોહનથાળનો પ્રસાદ મળતો હતો ત્યારે 10 જેટલા બોક્સ લઈને જતો હતો, ચીકીના પ્રસાદની ના નથી પરંતુ મોહનથાળનો પરંપરાગત પ્રસાદ ચાલુ રાખવો જોઈએ. અહીંથી જે મોહનથાળનો પ્રસાદ મળતો હતો તેનું બોક્સ ખોલતાની સાથે જ ખ્યાલ આવી જતો હતો કે તે અંબાજીનો છે.
ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર
