કોઇ પણ આંતરરાષ્ટ્રીય ક્રિકેટ ટૂર્નામેન્ટનું આયોજન થાય અને તેમાં ભારત અને પાકિસ્તાનની ટીમ મેદાન પર ટકરાય છે, ત્યારે આખી દુનિયાની નજર આ મેચ પર હોય છે. આ દુનિયાની સૌથી વધુ જોવાતી ક્રિકેટ મેચ છે. કરોડો લોકો આ મેચ મેદાન પર અને ટીવી-મોબાઇલ પર જુએ છે. હવે ફરી એકવાર ભારત અને પાકિસ્તાન વચ્ચે મેચ થવા જઈ રહી છે. આ ટક્કર જૂનમાં યોજાનારા ટી-20 વર્લ્ડ કપમાં થશે. ટી-20 વર્લ્ડ કપ 2024ની યજમાની અમેરિકા અને વેસ્ટ ઈન્ડિઝ સાથે મળીને કરશે. અત્યારે વર્લ્ડ કપને લગભગ 6 મહિનાની વાર છે, પરંતુ આ ટૂર્નામેન્ટનો માહોલ બનવાની શરૂઆત અત્યારથી થઇ ચૂકી છે. એવામાં આ ટૂર્નામેન્ટમાં ભારત અને પાકિસ્તાન વચ્ચે થનારા મેચ અંગે મોટા સમાચાર સામે આવ્યા છે.
મીડિયા રિપોર્ટ અનુસાર, ભારત અને પાકિસ્તાનની ટક્કર અમેરિકાની આર્થિક રાજધાની ન્યૂયોર્કમાં થશે. આ મેચ 8 જૂન અથવા 9 જૂનના રોજ રમાશે. તારીખ હજુ નક્કી નથી, પરંતુ ભારત-પાકિસ્તાનની મેચ શનિવાર અથવા રવિવારમાંથી કોઇ એક દિવસે યોજાશે. મોટા સમાચાર એ છે કે, ભારત અને પાકિસ્તાન વચ્ચે મેચ ડે-નાઇટ નહીં પરંતુ સવારે શરૂ થશે. અમેરિકામાં સવારે આ મેચ કરવાનો હેતુ માત્ર એટલા માટે છે કે લોકો ભારતમાં આ મેચને યોગ્ય સમયે જોઈ શકે. અમેરિકામાં જ્યારે સવાર હોય છે, ત્યારે ભારતમાં રાત હોય છે. ભારત-પાકિસ્તાનની મેચનો સૌથી મોટો ફેન બેઝ આ બંને દેશોમાં છે, તેથી અમેરિકામાં આ મેચ ડે ટાઇમમાં રમાશે. ટી-20 વર્લ્ડ કપના ઈતિહાસમાં આ પહેલી વખત બનશે જ્યારે ભારત અને પાકિસ્તાન વચ્ચે મેચ ડે હશે. આ બંને ટીમો વચ્ચેની મેચ હંમેશા ડે-નાઇટ રહી છે.
